ڈپٹی میئر کراچی سلمان عبداللہ مراد نے کہا ہے کہ حکومت نوجوانوں کے لیے مثبت سرگرمیوں کے فروغ کے لیے نئے منصوبوں پر کام کررہی ہے-
	12-Aug-2023
	ڈپٹی میئر کراچی سلمان عبداللہ مراد نے کہا ہے کہ حکومت نوجوانوں کے لیے مثبت سرگرمیوں کے فروغ کے لیے نئے منصوبوں پر کام کررہی ہے، لیاری کی عوام کے لیے ککری گرائونڈ میں نیا اسپورٹس کمپلیکس تعمیر کیا گیا ہے، ملیر میں بھی ایک اسپورٹس کمپلیکس تعمیر ہوچکا ہے جلد ہی اس کو عوام کے لیے کھول دیا جائے گا، یہ بات انہوں پاکستان کے 76 ویں جشن آزادی کی مناسبت سے وویمن اسپورٹس کمپلیکس میں منعقدہ کے ایم سی سمر کیمپ 2023 کی اختتامی تقریب سے بحیثیت مہمان خصوصی خطاب کرتے ہوئے کہی، اس موقع پر سینئر ڈائریکٹر سیف عباس حسنی، ڈپٹی ڈائریکٹر یسریٰ سیف اور دیگر افسران بھی ان کے ہمراہ تھے، ڈپٹی میئر کراچی سلمان عبداللہ مراد نے کہا کہ کراچی کے تمام اضلاع میں کھیلوں کے فروغ کے لئے بلدیہ عظمیٰ کراچی اقدامات کر رہی ہے تاکہ اسپورٹس کے انفراسٹرکچر کو وسعت دی جائے، دنیا کے تمام بڑے اور ترقی یافتہ شہروں میں نوجوانوں کے لئے کھیلو ںکی زیادہ سے زیادہ سہولیات فراہم کی جاتی ہیں تاکہ ان کو صحت مند اور مثبت سرگرمیوں کی جانب راغب کیا جاسکے، بلدیہ عظمیٰ کراچی بھی اس حوالے سے اپنی ذمہ داریوں سے آگاہ ہے اور ہرممکن اقدامات جاری رکھے ہوئے ہے، ڈپٹی میئر کراچی نے کہا کہ کراچی میں مختلف کھیلوں کے لئے باصلاحیت نوجوان موجود ہیں اور اس شہر نے ملک کو کرکٹ، ہاکی، اسنوکر، اسکواش، ایتھلیٹکس، باکسنگ، کشتی رانی اور دیگر کھیلوں کے چیمپئن دیئے ہیں جنہوں نے بین الاقوامی سطح پر ملک و قوم کا نام روشن کیا ہے، کراچی میں کھیلوں کی سرگرمیوں کے فروغ کے لئے ہر ممکن اقدامات کئے جارہے ہیں، کے ایم سی سمر کیمپ 2023 میں مختلف جامعات اور اسکولوں کی طالبات کی بڑی تعداد نے حصہ لیا ، اس سمر کیمپ میں فٹ بال، تیراکی، بیڈمنٹن، تھروبال، اسکیٹنگ اور دیگر کھیلوں کے مقابلے منعقد کئے گئے، تقریب کے اختتام پر ڈپٹی میئر کراچی سلمان عبداللہ مراد نے جیتنے والی طالبات میں انعامات تقسیم کئے اور پاکستان کی 76 ویں سالگرہ کا کیک بھی کاٹا۔
	News Photo Gallery