میئر کراچی بیرسٹر مرتضیٰ وہاب نے کہا ہے کہ ساڑھے آٹھ کروڑ روپے کی لاگت سے شادمان نالے کا تعمیراتی کام تیزی سے جاری ہے
	08-Aug-2023
	میئر کراچی بیرسٹر مرتضیٰ وہاب نے کہا ہے کہ ساڑھے آٹھ کروڑ روپے کی لاگت سے شادمان نالے کا تعمیراتی کام تیزی سے جاری ہے، جس کی تکمیل کے بعد شادمان کے علاقے میں بارشوں کے دوران نکاسی آب کا مسئلہ حل ہوجائے گا، برساتی نالوں اور ملحقہ سڑکوں کو شہریوں کے لیے محفوظ بنارہے ہیں، کراچی میگا پروجیکٹ کے تحت مختلف علاقوں میں جاری سڑکوں اور برساتی نالوں کے ترقیاتی کاموں کو جلد از جلد مکمل کیا جائے گا، یہ بات انہوں نے ضلع وسطی میں شادمان نالے کے تعمیراتی کاموں کا معائنہ کرتے ہوئے کہی، اس موقع پر ضلع وسطی میں پیپلز پارٹی کے سیکریٹری جنرل دل محمد، پروجیکٹ ڈائریکٹر میگا پروجیکٹس اور دیگر افسران بھی موجود تھے، میئر کراچی بیرسٹر مرتضی وہاب نے کہا کہ شادمان نالہ وہی جگہ ہے جہاں گزشتہ سال ایک حادثے میں فیملی نالے میں جا گری تھی، اس المناک واقعہ کا فوری ٹوٹس لیتے ہوئے شادمان نالے کی تعمیر کاکام شروع کرنے کی فوری ہدایت کی تھی، ماضی میں بارشوں کے دوران نکاسی آب کا معقول انتظام نہ ہونے کی وجہ سے شادمان کی آبادی میں پانی بھر جاتا تھا اور اس کی وجہ شادمان نالے سے پانی کے اخراج کا انتظام نہ ہونا تھا لہٰذا اب ایسا انتظام کیا گیا ہے کہ اس نالے کا پانی آگے جا کر قلندریہ چوک والے نالے سے مل جائے گا اور بارشوں کے دوران اطراف کی آبادیاں محفوظ رہیں گی، انہوں نے کہا کہ شادمان نالے کی کل لمبائی 1500 فٹ اور چوڑائی 10 فٹ ہے، جبکہ نالے کی گہرائی نو سے دس فٹ رکھی گئی ہے تاکہ نالے میں پانی کا بہاؤ بہتر انداز میں جاری رہے، انہوں نے کہا کہ یہ منصوبہ انتہائی اہمیت کا حامل ہے اس لئے دن رات کام ہورہا ہے اور جلد ہی اسے مکمل کرلیا جائے گا، آئندہ مون سون میں شادمان اور ملحقہ علاقوں میں رہنے والے یہاں ایک واضح تبدیلی محسوس کریں گے، میئر کراچی نے کہا کہ شہریوں کی سہولت کو مقدم رکھتے ہوئے ان کاموں کو ترجیح دی گئی ہے جن کی شہر میں فوری ضرورت تھی، ضلع وسطی میں نالوں کی تعمیر کے ساتھ سڑکوں کی استر کاری کاکام بھی کیا جارہا ہے، انہو ں نے افسران سے کہا کہ شہریوں کی سہولت کے لئے تمام کاموں کو تیز رفتاری سے مکمل کیا جائے اور ترقیاتی کاموں کے دوران ایسی حکمت عملی اختیار کی جائے کہ اطراف میں ٹریفک کی روانی متاثر نہ ہو، انہوں نے کہا کہ شہریوں کی سہولت کے لئے شروع کئے جانے والے کاموں کی مسلسل نگرانی کا عمل یقینی بنایا جا رہا ہے تاکہ شہر میں ہونے والے ترقیاتی کام پائیدار ثابت ہوں اور شہری طویل عرصے تک ان سے مستفید ہوسکیں