میئر کراچی بیرسٹر مرتضیٰ وہاب نے کہا ہے کہ عباسی شہید اسپتال کے نرسنگ اسکول کو پاکستان نرسنگ کونسل کے معیار کے مطابق سہولیات سے آراستہ کیا جائے-
	07-Aug-2023
	میئر کراچی بیرسٹر مرتضیٰ وہاب نے کہا ہے کہ عباسی شہید اسپتال کے نرسنگ اسکول کو پاکستان نرسنگ کونسل کے معیار کے مطابق سہولیات سے آراستہ کیا جائے اور سالانہ ترقیاتی پروگرام کے تحت نرسنگ اسکول کے ترقیاتی کام مکمل کئے جائیں تاکہ یہاں سے تربیت حاصل کرنے والے مزید بہتر انداز میں بلدیہ عظمیٰ کراچی کے طبی اداروں میں ڈاکٹرز کی معاونت کے فرائض انجام دے سکیں، یہ بات انہوں نے پیر کے روز ڈپٹی میئر کراچی سلمان عبداللہ مراد کے ہمراہ عباسی شہید اسپتال کے نرسنگ اسکول کے دورے کے موقع پر کہی، میئر کراچی بیرسٹر مرتضیٰ وہاب نے نرسنگ اسکول کے مختلف حصوں کا معائنہ کیا اور وہاں نرسز کو فراہم کی جانے والی تربیت کے حوالے سے معلومات حاصل کیں، انہوں نے کہا کہ عباسی شہید اسپتال کا نرسنگ اسکول طویل عرصے سے قائم ہے اور یہ اسکول پاکستان نرسنگ کونسل سے الحاق یافتہ ہے لہٰذا اسے مزید بہتر بنایا جائے اور تربیتی ادارے کی جتنی بھی ضروریات ہیں انہیں پورا کیا جائے، انہوں نے کہا کہ کسی بھی شعبے میں بہتر کارکردگی کے لیے حصول علم، مسلسل تحقیق اور تربیت بنیادی شرائط ہیں، خصوصاً میڈیکل کے شعبے میں ان چیزوں کی اہمیت اور بھی بڑھ جاتی ہے، نرسنگ کا شعبہ انتہائی اہمیت کا حامل ہے، یہ بڑی حد تک ٹیکنیکل شعبہ ہے جسے سیکھنے کے لیے شوق، محنت اور لگن ضروری ہے، ساتھ ہی دکھی انسانیت کی خدمت کا جذبہ بھی کار فرما ہو تو اس شعبے سے منسلک لوگوں کے لیے حقیقی معنوں میں یہ عبادت سے کم نہیں، انہوں نے کہا کہ عباسی شہید اسپتال کے نرسنگ اسکول کو ایک بہترین طبی درسگاہ بنایا جائے کیونکہ نرسنگ اسکول سے تربیت یافتہ نرسز اسپتالوں میں مریضوں کی زیادہ بہتر خدمت کرتی ہیں اس کے علاوہ جدید نرسنگ اسکول کراچی کے نوجوانوں کے لیے روزگار کے مواقع بھی فراہم کرے گا۔